Mipa leh hmeichhe mize maksak

Mipa :
* Mipa zawng zawng hi an buai em em vek.
* Buai viau mahse hmeichhe tan chuan hun an nei thei zel.
* Hmeichhe tan hian hun nei thei mahse, an ngaihsak tak tak lem lo.
* An ngaihsak tak tak lem loh lai hian pakhat tal chu an kawp ve reng si.
* Pakhat tal kawp ve reng mahse midang an beisei tel tlat thin.
* Midang beisei tel tlat thin mahse an kawppui chuan a kalsanin an thinrim thin.
* An kawppuiin kalsan mahse an thil tih dik loh atangin an inzir thei chuang lo a, midang an beisei chhunzawm zel thin.

Hmeichhia :
* Hmeichhe tana pawimawh ber chu pawisa neih hnem a ni.
* Pawisa neih hnem hi pawimawh viau mahse thawmhnaw man to tak tak an lei zel tho.
* Thawmhnaw man to tak tak lei thin mahse hak tur ka nei lo an ti reng thung.
* Hak tur ka nei lo ti reng mahse mawi takin an inchei thei zel.
* Mawi takin inchei thei zel mahse an thawmhnaw chu thing an ti viau zel.
* An thawmhnaw chu thing ti viau zel mahse fak erawh an phut ru tlat thin.
* Fak phut ru tlat thin mahse, i fak chiah chuan an awih leh duh ngai chuang lo.

Show Me The Way

Zantin ka mut dawn apiangin ka tawngtai ziah a, vanram hi a awm tak tak ka beisei ru tlat a. Heti chung hian nitinin ka rilru a buai belhchhah reng thung a, mithianghlim nia ka lo hriat ve thinte chu sualnain a bawm khat tlat a, misual ber berte an ni leh tlat zel mai a.
Ka naupan laia milar leh miropui tak tak, ka lo ngaihsan ve ber ber thinte lah chu engmah lo mai, hluma milem siam vel mai an ni zo ta si a. Ka thinlung hi a ruak huai tawh mai a, heng thilte avang hian ka ngaihtuahna a buai a, ka rinna thlengin ka hloh chho ta mai a.
Ka tawngtainaah chuan Pathian ka au a, ‘Kawng min kawhhmuh la, chu luiah chuan min hruai la, ka suangtuahna rilru buai tak mai hi min lak bosak la, kawng dik chu min hmuhtir hram rawh’ tiin ka ngen leh ngawt thin.
Zan a lo thleng a, ka muhil leh ta siai siai mai a, hun reilote chhung chu ka mumang chu serhhran tlak khawpa thianghlim  a ni ve a. Ka mit ka chhing a, he khawvel, sualna leh inhuatna hlira khat karah hian remna leh muanna chu a la awm a ni tih ngaihtuahna ka nei a, hei hian min chhawk ve leh hawk mai a.
Zing a lo ni a, chanchinthar ka’n en a, chanchin duhawm lo tak tak hlirin a khat leh chuk a, kawng dik zawh tur chuan hmabak kan la ngahzia ka hrechhuak leh ta uaih uaih mai a. Kawng dik kan zawh tak tak theih hun tur hriat theihna turin engemaw tak hriattirna ka dawn ka beisei ru reng a, mahse hlauhnaa ka khah tlat avangin hriattirna pawh chu ka ngaihtuah mumal thei chuang lo.
‘Engemaw’ tak chu lo hriain, eng duhawm tak mai pawh chu lo hmu ila, ka ring nghal thlap dawn em tih zawhna chuan ka thinlung a luah khat leh a, ka buaina a belhchhah leh ta vek mai a. Pathian tanpuina dilin, hetiang hun a thleng ta a nih pawhin min hriattir ngei turin ka ngen leh ta ngawt mai a.
Hei mai hi duhtawk loin, chakna leh huaisenna ka dil a, kawng dik zawh tur min kawhhmuh hun atan min buatsaih turin ka dil a, engtikah emaw chuan chu hmun ropui chu ka thleng ngei ka ring tlat a ni.
Zan mut dawna tawngtai chu ka bansan ngai hauh lo a, vanram chu a awm tak tak beisei reng chungin Pathian hnenah chuan kawng dik zawh tur chu min kawhhmuh turin ka dil reng mai a ni.
Styx chuan December, 1990 khan ‘Show Me the Way’ tih hla, mawi tak mai chu an tlangzarh a. He hla hi lead vocalist/keyboardist Dennis DeYoung phuah niin, Roman Catholic ruh tak mai a ni a. He hla hi a fapa Matthew-a tana a phuah a ni a, he khawvel hi huatnain khat mahse a fapa chu rinawm taka Pathian hnung zui zel tur a duh thu a phuahna a ni.
Vengchhungah thianzahoin band kan din ve thin a, keiin bass perhin Lalrotluanga chu lead guitarist a ni a. PB Lianhmingthanga’n keyboard a tum a, Chhuantea chu vocalist a ni a. Hla chi hrang hrang sain, he hla ‘Show Me the Way’ hi kan thiam bel em em a, ‘Kan hlapui’ ti hialin kan sawi thin a. Vengchhung thiltihna mai bakah Bial KTP thiltihah te, Vanapa Hall ah te kan sa ve hman a ni.
Kan intawhkhawm leh hun nghaka chatuan ram atanga min lo thlirtu, Chhuantea’n thiam tak maia a sa vawng vawng thin kha rilruah a cham reng a, tun thleng hian thinlungah a la reh thei lo. He hla ngaihthlak apiangin thinlungah Chhuantea a thar ziah a ni.
Khawvela a thenrual tha, chhungkhat laina leh ringtu zingah he hla phuahtu rilru ang pu an awm ve fur a rinawm a, rilru hah chang te, ngaihtuahna fel lo tak tak, rilru tibuai tak takin min bawhbuai chang pawha Pathian hnena tanpuina dil zel a pawimawhzia hrechhuak thar turin Chhuantea pawhin min duh ka ring tlat a ni.

Is this the world we created?

A thil hriat thar chuan a rilru a luah khat nghal vek mai a, eng dang mah a ngaihtuah thei lo.
 

TV ah chuan Africa ram chanchin an rawn tilang a; an ram retheihzia te chu engmah zep then awm hauh lo in a lang vek mai si a, a chhungrilah chuan a tawt nghal up up a, a awmdan chu amah pawhin a hrethiam meuh lo.
 

A ngaihtuahna a buai nuaih mai a, a thin a rim viau laiin lungchhiatnain a bawh tel bawk a. A tha a zawi vek a, a hnuk te chu a ulh teuh mai a. A rilruah eng dang mah a lang thei tawh lo, khuanu remruat dan mak tihna te a rawn lan phah hial mai.
Mihringte’n siamtu kutchhuak ropui tak kan suasam nasat tawhzia te chu a ngaihtuah chhuak ta uaih uaih bawk a.
 

Pathian thilsiam zinga ropui ber, Ama anpuia a siam, a hmangaih em em mihringte khawsak dan dik lo lutuk avanga mahni tawrhna insiamchawp vanga mi tam tak hrehawmna khura an pil thuk tawhzia a ngaihtuah phei chuan a puakkeh lo chauh.
 

Khawvel hmundanga chengte aiin an ril a tam har bik pawh a ni lo, ei leh in an ngaina lo bik hek lo; midangte ang bawka riltam thei, hrehawm pawh hre ve thei an ni.
 

An ril chu tam eng ang mahse an dinhmunin a zir miau loh avangin an taksa mamawh ang ei leh in tur an nei miau si lo. An nunphung chu hrehawm an ti em em a, dingchhuak leh turin kal ngaihna an hre si lo.

Eng ber nge an mamawh pawh hre lo khawpa bo chung chuan an vak darh a, an tawn fuh fuh tawng turin an mitlaw chhuah ve thawr zel mai chu a ni si a!!
 

Hetiang khawvel hi keimahni siamchawp chu a ni si maw? Eng vanga hetianga chhuah nge maw kan nih chu le? Pathian pawh zah zo lo khawpin kan suasam a maw? Hetiang mai hi a ni maw kan damchhan lo ni ta? Kan khawvel siamchawp zet chu le!!!

Nitin hian naute pawi sawi lo, chinchang engmah la hre lo an piang ve reng bawk si a. Heng nausen rawn piang, engmah thil awmzia pawh la hre lote hian hmangaihtu an mamawh a, inchhung nuam tak, chhungkaw hlim tak uapna chu an thlahlel ve em em si a. Mahse, heng thilte hi chu an tan chuan vana rah ang a ni si.

Khawvel hmundangah chuan mihausa tak tak, an sum neih lutuk vanga awm ngaihna pawh hre tawh lo, sum hman ngaihna pawh hre tawh lo an kat nuk mai a. Heng mite hian lal an hrawt a, an duhthalin an khawsa bik si a.

Khawvel lehlama harsatna chi hrang hrangin a tlakbuak mekte chu an rilru peng khat pawhin an hre der si lo. Khawvel vir vel chu an thlirliam satliah vel mai mai tawh a. Khuanu remruat dan hi hriatthiam zawng a har a ni..

Mihringte’n kan chenna khawvel nuam tak mai kan tihkhawloh tak avangin keimahni vekin kan tuar a. Vanah khian Pathian hi a awm tak tak a nih ngai chuan hmangaih taka a siam, mihringte chenna tur khawvel kan tihchereu dan hi a hmuhin engtin tak ngai ang maw?

1981 khan Queen chuan an album thar tur ‘Hot Space’ atan hla an phuah tan a, hla ropui leh lungkuai zet mai ‘Is this the world we created’ tih chu chawpchilh deuhin an phuah a. A hmaa an lo phuah tawh ‘There must be more to life than this’ tih thlakna atana hman an tum uk a. ‘Hot Space’ ah hian an telh leh ta lo a, ‘The Works’ album atan an khek leh ta zawk a.

He hla thu hi Freddie Mercury phuah a ni a, TV ah Africa ram documentary a en fuh a. Hetah hian Africa ram retheihzia a hmu a, a rilru a khawih em avangin he hla tawi tak, mahse ril em em si hi a rawn phuah chhuak ta a ni.

Brian May chuan Freddie hla thu phuah sa chu a thluk a siam ve leh a. Nihnih chhung lekin an peihfel der mai a. Freddie hian khawvel ram rethei tam tak a awm laia ram hausa te’n an vei tawk lo nia ngaihna thinlung a nei lian hle a, rethei leh hausa kar inthlau tawh lutuk chu a dik a ti thei ngang lo a ni.

Just look at all those hungry mouths we have to feed
Take a look at all the suffering we breed
So many lonely faces scattered all around
Searching for what they need

Is this the world we created?
What did we do it for?
Is this the world we invaded
Against the law?
So it seems in the end
Is this what were all living for today?
The world that we created

You know that every day a helpless child is born
Who needs some loving care inside a happy home
Somewhere a wealthy man is sitting on his throne
Waiting for life to go by

Is this the world we created?
We made it on our own
Is this the world we devastated
Right to the bone?
If there's a God in the sky looking down
What can he think of what weve done
To the world that he created?

Pawisa chuan....

Khum a lei thei a,
Mutthilh erawh a lei thei lo.

Sana a lei thei a,
Hun erawh a lei thei lo.

Lehkhabu a lei thei a,
Finna erawh a lei thei lo.

Nihna a lei thei a,
Zahawmna erawh a lei thei lo.

Damdawi a lei thei a,
Hriselna erawh a lei thei lo.

Thisen a lei thei a,
Nunna erawh a lei thei lo.

Chuvangin, PAWISA hi engkima engkim a nih lohzia a chiang.
Natna leh tawrhna te a thlen fo lehnghal.

Thian tha tak tak, kan duhsakte tawrhna leh natna te chu tihbosak kan duh thin...

An natna leh tawrhna kan tihbo theih nan hemi thlentu PAWISA hi min pe vek se, an nat ai leh an tawrh ai lo tuar ila.

Hetianga an nat ai nat huam, an tawrh ai tawrh inhuam thian tha an nei hi chu vannei an inti ve viau ang.

SMS hmangin tawng kan suasam

    Mobile phone in min chiah hneh ta hle mai a, chitin chitangin kan nei fur tawh hlawm a. Tleirawl pawh la hre lem lo te thlengin khawilo kalnaah mobile phone an hum far tawh mai a. Hetiang taka kan leklam ta hi changkannain a ken tel chu ni tho mahse fuh lohna a nei nual mai.
    Kawng hrang hrang chu sawi lem lo ila, ka ngaihpawimawh berte zinga mi, SMS inthawnna vela tawngkam an hmang uluk ta lo lutuk hi ka vei em avangin heti lam chauh hi thlur bik ngaiin ka hria.
    SMS inthawn hi a biaka inbiak kher ai chuan kan hmang tlanglawn ber zawk niin a lang a. An thu chhut dan tam tak hi chu chhiar a harsa nek nek hle mai!! Min rawn thawn tam tak hi chu a awmzia ka hriat thin loh avangin min rawn thawntu hnenah 'Ka chhiar thiam lo' tih ka thawnlet fo reng a.
    Hetiang kan ching hi a tha lo em em mai a, kan rilruah ngaihsamna te, thatchhiatna te, inthlahdahna te chu zawi zawiin a tuh chho zel a. Hun a kal zel phei chuan Mizo tawng hi kan suasam nasa lutuk dawn niin a lang tlat. Tun vut vutah chuan a thleng thut kher lo a ni thei a; mahse, tam takah chuan a langchhuak tan tawh tlat si. Mizo tawng thiam chiang chiah si lo, tawng dang thiam em em si loah kan chhuak ang tih a hlauhawm ka ti.
    Thalai tam zawk tawngkam hman hi kan chik ve thin a nih chuan dik chiah lo deuh hi a tam ta hle mai a. Hengte pawh hi SMS thawn duhdahin a nghawng zinga pakhat niin a ngaih theih ka hria a. Tuna ho deuha lang hi nakinah chuan buaipui tham zawng a la ni ngei ngei dawn a, chuvangin thlir liam mai mai chi niin ka hre tlat lo.
    'Ek n ceh reg rigwt mai', 'mdag in mn gak, k cyg thei toh lo', 'lug a leg th m my', 'thln hnah ka rn t ve dn', 'k hw twh dn a' tih ang chi te hi Mizo tawng ziak dan tur a ni lo chiang khawp mai a. Hetiang SMS hmang hian kan tawng kan suasam nasa mah mah deuh zawng a ni. Theihtawpa humhalhtu tur zawkin hetianga kan sawp retheih zel chuan kum tam a liam hmain kan mumal lo nuaih tawh mai ang.
    Pangngai taka SMS inthawn hi thil harsa leh hahthlak a ni lo a, kei ngei pawh hi SMS hmang nasa em em mai ka ni a, tawngkam pangngaia kan hman ang thlap thlapin ka thawn thin. A dik taka thu inthawn avanga hunin a daih tak loh emaw chu an awm ka ring hauh lo a, an phone a chhiat phah emaw, an kut a nat phah emaw pawh ka ring hek lo. Chuvangin, hetianga tih hi chu inthlahdah vang te, thatchhiat vang te a ni berin a lang.
    Keini Mizo te bak hi 'Mizo tawng' humhalh tur kan awm tawh chuang lo a, hei hi hriain SMS a ni emaw, nitina midang kan biaknaah emaw pawh ni se, tawngkam pangngai kan neih hi hmang hram hram ila a duhawm khawp mai.

Thalaite leh tunlai khawvel

Mizoramin kan buaipui leh kan hlauh em em chu ‘lirnghing’ a ni. Lirnghingin a nuai na ramah chuan thihna leh chhiatna rapthlak a thleng thin. Mahse, hei aia hlauhawm zawk chu ‘nun nghing’ hi a ni. Tleirawl/rawlthar, kum 13-15 inkar nun a nghin laklawh tawh chuan siamthat a har em em a. Anmahni nunah damchhunga reh thei tawh lo tur ‘Ser’ insiamin, nih tur ang an ni pha lo a, an zirnain a tuar a, mahniah ‘inthiam lohna ruk’ neiin, an nun a inchawm a, a thente phei chu ‘mahni intihlum’ ta mai te pawh an awm fo a ni.
Kan fimkhurna tur thil tlem azawng thlirho ila.
1.    Tattoo :
Tattoo hi hun engemawti kalta atang khan thalaite’n intihchangkan nan intih tunlai nan chhut kan uar hle mai a. Amaherawhchu tattoo hi tunlai thil thar rawn chhuak ni lovin, hmanlai atanga an lo chin tawh a ni. Chung lo ching hmasate chu ringlo mi, ramhuai biate, Baal pathian bia te, thingbul lungbul be thinte, hringeite an ni tlangpui. Tin, heavy metal star te, biker te, gang rual te pawhin an ching nasa hle.
Anih chuti a nih si chuan keini’n kan lo chin ve ngawt hi a dik em? Kan Bible chuan “Do not cut your bodies for the dead of put tattoo marks on yourselves” (Leviticus 19:28) a ti. Chuvangin, Kristiante chuan Bible in ti lo tura min hrilh chu kan ti tur a ni lo ang.
2. Horoscope :
Tunlaia thalaite’n kan buaipui tak pakhat chu ‘Horoscope’ hi a ni. Horoscope hi dawithamna chikhat niin milem (ni, thla leh arsi) be tute’n an thlarau zawl atanga lo chhuak a ni. “Arsi zir mite, mifingte siam alawm” i ti maithei. Mahse, kan Bible chuan “A siamtu biak aiin a siama chu biain, a rawng an bawl ta zawk a” a ti. (Rom 1:25).
Chuti a nih si chuan arsi, ni leh thlate siamtu ‘Pathian chibai buk’ aiin a thil siam chibai lo bukna a lo ni reng a nih chu. Kan fimkhur a va pawimawh em! Keini chuan kan hmathlir (future) atan Horoscope aia ‘rintlak Pathian kan nei’ tih hi kan hre reng dawn nia.
3. Emo :
‘Emo’ tih tawngkam hi tunlaia band lar tak ‘Tokyo Hotel’ atanga kan uar thar niin a lang. A nihna takah chuan ‘Emo’ tih tawngkam hi ‘Hardcore punk’ music atanga rawn zichhuak niin, ‘Emo music’ hrim hrim hi D.C. Hardcore punk hunlai, Rites of Spirit band (America) atanga kum 1980 vel atanga rawn chhuak a ni a. ‘Emo’ tih hi ‘Emotive Hardcore’ emaw, ‘Emotion’ ti paw’n a sawi theih awm e.
Zirmite leh chikmite chuan “Emo ho chu mahni inlabing, mahnia zia inti nei hrang leh mahni hriselna aia incheina ngaipawimawhho” tiin an sawi a. ‘Emo’ haircut hi 2000 A.D. vel atanga rawn chhuak niin an incheinaah pawh tight jeans, T-shirt (music band lem chuang) leh converse pheikhawk te an uar hle a, ‘Emo boy’ leh ‘Emo girl’ te hian make-up an uar hle bawk.
Tunlai hian Emo style lo copy a inchei thalaite kan tam ta hle mai. An style lo copy a, ‘It’s my life’ lo tih ve ngawt hi Kristiante tih tur em ni dawn? I Kor. 6:19-20 ah chuan, “Mahni ta pawh in ni lo a, mana lei in ni asin..” a ti. Chuti a nih chuan ‘It’s my life’ ti ngam tur kan ni dawn em ni? Rom 12:1-2 ah chuan, “He khawvel dan ang hian awm suh ula..” a ti a. Chuti a nih chuan Kristiante tih a mawia kan inchei a tul a ni. Tunlaina hian thalaite hi min tlan khalh lo se, thalaite hian tunlaina hi i tlansan ang u.
4. Om sign :
Tunlaiin hetiang inziahna T-shirt tam tak a awm a, kan nulate zingah pawh hetiang awmna ha hi tam tak an awm a ni. Hei hi ‘Om pathian’ sign, Hindu ho pathian serh leh sang a nih avangin Kristiante chuan nalh hle mahse kan hak loh ngam a tul a ni.
5. Ganesh sign :
Hei pawh hi Hindu ho pathian sign a ni a, a bikin T-shirt ah hmuh tur a tam hle mai. Kan hak loh ngam a tul a ni.
6. Taoism :
Khawchhak sakhua, Taoism sign niin; thi, bengbeh, T-shirt ah tam tak a awm a, inbel lo ngam Kristian thalai i ni ngam ang u.
7. Neronic cross/Nero cross :
He symbol hi kum 2000 kal liamta ah khan Kristiante huatna chhinchhiahnan an hmang a. Thi, bengbeh, T-shirt, toys, wallet, calendar, kawnghren, etc. ah te a chuang thluah mai a. Anti-Christ (Isua dodaltute) sign a nih avangin Kristiante chuan kan inbel lo mai ni lovin, kan haw ngam tur a ni.
Tlangkawmna :
Tam tak sawi tur a awm, kan sawi seng lo. Mahse, khan kan sawi tlem azawngte kha kan tih loh ngam a, kan zawm phawt chuan kan nunah ‘lei rem’ kan rah phah thei dawn a ni. ‘Hetiang sign, a ho lutuk’ i lo ti palh ang e.
Dr. Rebecca Brown chuan, “Sual luh theihna, keimahnia awm zawng zawng hi kan dang ngam tur a ni,” a ti. Sualin a zuam ngam thawmhnaw i inbel fo emaw, Kristiante tih a mawi ni lo zawnga i nun i hmang a nih chuan ‘lo inchik reng rawh’.
Kan thanlen chhoh zelnaah hian sual lam kan awn tlat zel zuk nia. Chuvangin, ‘Engpawh ni se, in awm dan chu Krista chanchintha nen inmil phawt rawh se’ (Philipi 1:27-28).

Hriatthiam har an ti

Scientist rualte hian thiam loh an nei tawh lo emaw tih mai tur a ni a, a lo ni bik hauh lo. Mihring nunphungah hian hrilhfiah theih loh an lo la nei ve nual mai a. Heng zinga a langsar zualte hi han thlur bik ila.
1. Sen awp awp :
Dawt sawi emaw, zah deuh emaw chuan mi tam tak chu an sen awp awp thin a. Hei hi Charles Darwin pawh khan a chhan a hrilhfiah thiam bik lo a. Tun thleng hian hetianga kan awm theih dan hi tumahin an la sawifiah thei tlat lo.
2. Nuihza :
Mihring kan nuih hian kan rilru tihahdamtu hi kan taksaah a insiam thin a. Mahse, kum 10 zet an zir hnuah fiamthu aiin tawngkam uchuak hian mi a tinui nasa zawk tih an finfiah a, hei hian an ngaihtuahna a tibuai leh map mai.
3. Infawh :
Infawh hi eng vanga ching tan nge kan nih? A chhanna an hre thei lo. Thenkhat chuan hnute hnek atanga chhawm chhoh niin an ngai a, dik erawh an ti chiah bik lo.
4. Mumang neih :
Sigmund Freud khan kan ngaihtuahna chhungril ber phochhuaktu chu mumang a ti thin a. Mahse, hei hian pawm a hlawh lo viau a. Mumang maksak deuh deuh kan neih chhan hi sawifiah thiam an la awm tlat lo.
5. Puithuna :
Eng vanga puithuna hi awm chho tan nge tih hi an la hre thei meuh lo a, tam tak chuan sakhuana atanga rawn chhuak niin an ring ringawt.
6. Hnapkhir kheuh :
Thil chin mawi lo tak, tupawhin an tih tawh vek ni si hi eng vanga ching chho nge kan nih tih hi sawifiah ngaihna an hre chiah lo.
7. Tleirawl :
Thil nung zingah tleirawl chhuah, taksa inthlak danglam hi mihringah chauh a awm a. Taksa mai bakah nungchang a inthlak chhoh dan hi sawifiah thiam an la awm chiah lo.
8. Thilphalna :
Phut let awm miah lova midangte hnena thil kan pe thin hi nunphung danglam zinga sawifiah harsa an tih pakhat a ni.
9. Duhzawng :
Zai, lam, rimawi ngainat, lemziak ngainatna te hi eng vang taka insiam nge tih an sawifiah thiam lo a. Hetiang thil hi kan hriatna tihpunna atan niin an ngai ber.
10. Taksa hmul :
Mihring tam zawk chu hmul nei kan ni hlawm a, taksa hmun hrang hrang a hmul hlawm a. Heng hmul kan neihte hi a tangkaina sawi fak tur an hre mumal tlat lo.

Mipa rilru a na thin

Hmeichhiate hi mipa aiin an awm a nem zawk kan ti thin a, a ni reng bawk a. Hetiang a nih lai hian mipa rilru han tihnat leh mipa an tihduhdah ve deuhna lai a awm thin.
1. Phone an la duh lo :
Hmeichhiate hian mipa tam tak hi an phone number an hrilh tha duh lo a, an hrilh ve pawhin a dik lo te an hrilh a. A number dik tak an pek pawhin mipa zawkin biak an tum changa phone lak duh loh an ching.
2. In tur leitir :
Hmeichhe tam tak chu khawilo an chhuah changin anmahni sum hman tum miah lo hian an vakchhuak ve tawp a. Mipa an tawn remchangte chu an duhzawng leitir tum sa ranin an awm thin a. Bar velah emaw phei chuan in tur leh ei tur leitir phet an tum thin a. An duh ang an leisak hnu chuan an kalsan leh daih zel.
3. Kar awl hnawhkhahna :
Hmeichhe tam tak chu an kawppui nen an inthen chiah hian an mipa tawn remchang chu a kar awl hnawhkhah nan an kawp a, an duhzawng an hmuh chuan an tawpsan leh daih zel.
4. Mittui an hmang tangkai :
Mipa te hian hmeichhe tap lai hmuh hi hrehawm an ti tlangpui a, hei hi hriain hmeichhe tam tak chuan an mittui hi an duh duha mipa kawihher nan an hmang thin.
5. Kut thak hnawihna :
Mipain hmeichhia kut an thlak hian sawisel an hlawh viau a, hmeichhiain an thlak ve thung hi chuan an enliam leh mai thung a. Hemi hre ran hian hmeichhe tam tak chuan an kawppuite hi kut thak hnawihnan an hmang chawk thin a, mipain an tilet dawn lo tih an hriat avangin an zawngchhang phah fo bawk.
6. Mi zinga sawisel :
Mi awm tamna laiah an kawppuite sawisel vak ching an awm thin a. Mipa rilru nat leh nat loh lam an ngaihtuah vak tawh ngai lo.
7. Inthiktir :
Hmeichhe tam tak chu an kawppui te’n an ngaihsak vak lo nia an hriat chuan engmah sawichhuak lem lovin midang an kawp kual vel a. An kawppuite chuan thik se an tih thin vang a ni.

A hmangaih che em?

Mit leh mit a intawng chiah a, i rilruah zawhna a rawn lut nghal zut zut mai a. “I kawrhak kha inhmeh a ti che em? Inkawp i duh a, mahse a melh dan che kha a lerh lutuk em aw? I melh ngun avanga mak ti ena rawn en ve mai ani zawk em?”
Hetiang thil hi thalai chuan an tawng ngei ngei a, inngaizawng ni lem lo, ralkhat atanga induhtawn si, sawilang ngam si lo hi an awm fur reng a ni.
Ralkhat atanga inhel lai vel hian an mizia tur chu kawng tam takin a hriat theih a, hemi azir hian bawhzui chi nge chi loh tih pawh a hriat then theih a ni.
Mipa tan :
Hmeichhe chet dan atang hian thil tam tak a hriat ve theih a, a then tarlang ila.
Mit : A mitmu a tihchet dan khan thil tam tak a tilang a. Nangmah a thlir pah che khan a hma aia a men zau zawk chuan a ngaihven che tihna a ni a. Thildangah tilang lo mahse a insum seng lo tihna a ni a, hmeichhe zakzum lamah a awm duh bik. Bawhzui vat mai tur.
Sam : I bulhnaia a awm laiin a sam a khawih sek emaw a nih chuan i vannei thut thei ania.
Dar leh khup : I bulah emaw a thut laia nangma lam hawia a dar leh khup te a hawitir chuan a ngaihven hle che tihna a ni a, lawm hle ringawt rawh.
Hmeichhe tan :
Mipa pawh hian inthup tum viau mahse tihlan chin an nei thin a, chutiang chu ngun taka lo chik mai tur a ni a. Kawp che a duh tih hriat theihna awlsam thenkhatte chu :
Mipain a hmeichhe duhzawng a hmuh chuan a mithmul chu a tisangin a tihniam vel thin a, a chal chu a rawn chuar tap mai ang. Nangmah a hmuh vang che a hetianga a awm chuan ‘a chiang sa’ a ni mai.
In mit a intawn chiah khan tlemin a thle deuh bak a nih chuan a ngaihven hle che tihna a ni bawk a. I bula a awm laiin a nui deuh sang reng a nih pawhin a thinlungah i tla na hle tih hria ang che.
I tih ang zela a ti a nih chuan ngei mai suh, a tum reng vang pawh ni lovin, a rilru i luah khat lutuk a, a ngaihtuah miah loh laiin a lo ti ve zel a ni mai.
Thil dang ngaihtuah lek lova a thlir reng che a nih phei chuan kawp che a duh tih a chiang. I tan chuan ‘Aw’ nge ‘Aih’ tih a ni tawh mai.
Thlirna dang :
Nangmah en che hreh hmel deuhin i lam rawn hawi emaw, in mit a intawn dawn pawha a hawisan zel che chuan a duh vak lo che tih hriat a tha.
In inbiak lai vela hmundang a melhkual emaw, lehlam hawi chunga a be vel mai mai che a nih chuan beisei chi a ni lo.
‘Min la hmangaih em?’  He zawhna i zawh laia a hmui a hup emaw, a hmui a hliah zel chuan ngaih titha reng reng suh. A hmui a liak emaw, hmundang a melh daih emaw, a mit chu hnuailam leh dinglama a lentir chuan midang zawn a hun tihna. Beisei zui mah la a tui tak tak tawh chuang lo ang.

Pasal atana neih loh turte

I bialpa chu i hmangaih ve hle mai a, pasal atan pawh i duh hle mai a. Mahse, i tan a tha ber ang em tih erawh ngaihtuah ngun a ngai khawp mai.
Catholic puithiam, Father Pat Connor chuan kum 40 teh meuh mai nupa chungchang hi a zirchiangin, nupa inkar buai a lo chingkual tawh a. Pasal atana neih tlak leh tlak loh chu an mizia atangin a hre tawh hle.
Pat Connor hian innei turte chu counselling a neihpui hnem tawh hle a, mi 200 chuang chu a lo inneihtir tawh a ni.
Hmeichhe zingah pawh tleirawl chhuak hlim ho hi a zirtir nasa bik hle a. Ngaihzawng an neih tawh hnu chuan an mit a del vek tawh thin a, ngaihzawng an neih hma hian an rilru a la fim ber niin Connor hian a sawi.
A sawi dan chuan mi a hmangaih vak theih a, mahse an han inneih chiah hian a fuh vek ngai lem lo a. Hei vang hian hmeichhiain an mipa duhzawng tak pawh ni se, a hnuaia mi ang hi an nih chuan pasal atan an tha ngai lo a ni.
Pasal atana neih chi loh te chu :
1. Nu te tih ang anga awm.
2. Mipa pawisa hmang thiam lo tak.
3. Thian nei mumal lo.
4. Mi zinga i rilru tihnual thin.
5. Midangte khak mai hreh lo.
6. Amah an fiam tuma nui ve duh ngai lo.
7. Thuneihna intawm duh lo.

Kashmir ah Isua an phum

“Isua Krista kha kraws-a an khenbeh khan a thi lo a, an lakthlak hnuin Kashmir lamah a kal a. Kashmir ah hian hun engemawchen a khawsak hnuin Srinagar ah a thi a, helai hmunah hian an phum zui ta a ni.”

He thu hi tunhnai mai ni lo, hun rei tawh tak atang khan an lo sawi thin a, awihtu pawh an thahnem viau mai a. Srinagar a hmun pakhat, Rozabal hmun thianghlim an tihah Isua hi an phum niin an ring hlawm a ni.
Tunhnai khan Isua thlah kal zel nia insawi pakhat, New York lama lehkhabu ziaktu Suzanne Olsson chuan Isua ruang chu phawrh leh a tum a, inhnialna a chawkchhuak nasa hle.
He hmun thianghlim, Rozabal hi 1973 khan Srinagar journalist pakhat, Aziz Kashmiri chuan a lehkhabu ‘Christ in Kashmir’ ah a ziaklang a, heta tanga lar chho hi a ni.
A ziah dan chuan kum 2,000 chuang kalta khan Isua chu an khengbet ngei a. Mahse, kraws ah khan a thi lo a, Kashmir lamah hian a pem a, a hnuah Srinagar ah hian an phum ta niin a ziak.
Suzanne Olsson hian Isua thlah chhawng 59 na niin a insawi a, he hmun thianghlima an sawi hi zirchianga, DNA test neih a tum a ni.
Olsson chuan Rozabal hi an chhungkaw thlan hmun a nih thu a sawi a. France ram mi an nih thu sawiin, Isua leh a nupui Mari Magdalini te chu Isua an khenbeh hnu khan France ah hian kum 30 an khawsa phawt niin a sawi bawk.
A sawi zelnaah chuan Isua leh Mari Magdalini hian fapa pahnih leh fanu pakhat an nei a, Suzanne hian Isua fapa pakhat zawk thlah kal zel an nih thu a sawi a ni.
Suzanne Olsson hian Isua ruang chu haichhuah leh ngei a tum hle a, hei vang hian thlan vengtu pakhat, Mohammad Amin chuan an kalh tlat thu leh ngun lehzuala helai hmun hi an ven thu a sawi a. Isua chu khawvelah an phum tih thuthang chu dawt mai a nih thu a sawi bawk.
Islam lehkhabu thianghlim ‘Quran’ ah chuan Isua chu ‘Messiah’ tiin a inziak a, kraws-ah pawh an khengbet lo a, Pathian hnenah a nung chungin a chho niin a inziak bawk.
Amin chuan Quran zirtirna atang chuan Olsson-i ngaihdan chu pawmpui harsa a tih thu sawi a. Olsson-i lakah hian FIR te pawh an thehlut a, a visa pawh thuneitute an cancel tir hial a ni.
Olsson-i ngaihdan tawmpuitu pakhat, Kashmiri lehkhathiam Fida Hassnain chuan 1994 khan lehkhabu pakhat ‘A Search for the Historical Jesus’ tih a ziak a, hetah hian Srinagar-a Isua an phum chungchang hi a ziak a. Hemi hnu hian Olsson nen hian lehkhabu pakhat ‘Roza Bal the Tomb of Jesus’ tih an ziakdun leh bawk.
Amin chuan hetianga thuthang a awm tan dan chiah hi hrechiang lo mahse, an khuaa sumdawng thenkhatin an khuaa mi an hipluh theihna a nih beiseiin dawt an thehdarh ni bera a hriat thu a sawi a. Thlan tlawhtu chu an thahnem thei ngang mai a, an khua chu an buai phah hle niin a sawi bawk.
Khualzin pakhat, helai hmun en ve pakhat pawhin thlan chu a lo tichhia a, a them thenkhat chu a hawn nghe nghe tih a sawi.
Rozabal chauh lo, thawnthu dang hmangin Isua leh Kashmir hi an sawizawm tel bawk a. Srinagar bul lawka Buddhist biak in pakhat chu Isua hian a tlawh niin an sawi bawk.
India rama Isua kal chungchang pawh an sawi nasa hle a, Islam, Buddhist leh Kristian mithiam thenkhat thuziakah chuan Isua hian India hi kum zabi 19 na velah khan a tlawh niin an tarlang a.
Isua hi kum 12 leh kum 30 inkar a nih lai khan a chanchin hi hriat mumal theih a ni lo a, Chanchintha bu velah khan engmah a intarlang lo a. Hemi hun chhung hian Isua chu India ah kalin Buddhist rinna vel a zirchiang niin an sawi.
Hetianga buaina neuh neuh a awm chhoh takah chuan Rozabal enkawl tura an din, Caretakers’ Committee chuan sakhaw hruaitu hrang hrang kohkhawm an tum a, hmalak zel dan tur an rel dawn niin Mohammad Amin chuan a sawi.

Buaipui tham ‘Sexting’

Kum 10 pawh a la liam hman lo, khatih hunlai khan nupa emaw, inngaizawng karah emaw rinawmlo deuhte manchhuahna tha tak chu kawr nghawnga hmui hnawihsen kai te, hotel bill sang lutuk te emaw a ni thin a. Tunlai khawvelah chuan engkim a danglam zo ta.
Khawvel hmun hrang hrangah mobile phone in mihring nunah hmun a luah nghet tawh hle a. Kan ram ngeiah pawh mitin maiin neih an tum tawh a tih theih bawk a. Mobile phone hi a tangkai viau laiin kawppuite laka rinawmlohna lanchhuahtirtu a ni tan tlat. Ram changkangte ang bawkin hmundanga kal chhuak lem lo pawhin, mahni inchhung lum atangin kawppuite lakah a rinawm loh theih ta a. Kutzungpui chauh tiche chungin midang nen thinlung inpawh takin a awm theih der tawh a ni.
Khawvel hmun hrang hrangah hetianga SMS hmanga thu thianghlim lo tak tak inthawn hi an uar hle a, a sawi awlsam nan ‘sexting’ an ti mai a. A tir takah chuan thalai zawkte zingah a tam hle a, tunah chuan tlema phanchang zualte zingah pawh thil thar a ni tawh tlat lo. Ngaihzawng nei lai emaw, nupui pasal nei tawh emaw zingah pawh ‘sexting’ hian bu a khuar hneh tawh hle a. Tunhmaa uirena kan tih ang tak kha ni tawh lo mahse hei hi ‘uirena chhuak thar’ a tih theih hial tawh awm e. Thenkhat chuan uirena ang ema ngaih chu dik an ti lo maithei a, mahse psychotherapist Paula Hall chuan ‘tisa uirena’ em thleng lo mahse ‘rilru uirena’ a thlen hrim hrim avangin sawi hran theih a nih loh thu a sawi ve mauh mai.
Paula chuan, “Sexting ti thinte zingah thudik puanchhuah duh lohna thinlung a awm a, kawppuite laka thil zepruk ngai a awm avang hian a thianghlim tawh lo a. Kawppuite laka rinawmlohna lian tak chu a ni tawh hrim hrim,” a ti a.
“Hetianga kawppuite laka thuruk neih tlat hi a pawi a, inkawp zelna kawngah thil pawi tak a thlen thei a ni,” a ti bawk.
Ram changkang zawkah te chuan SMS mai ni lovin, an phone changkang tak tak hmangin an thlalak saruak deuh deuhte MMS hmangin an inthawn thin a. Hetianga an inthawn chhoh zel hnu chuan a taka intawn duhna thinlung a siam ta thin a ni.
Sexting hi a bik takin thalai zingah hian a hluar hle a, kan ramah chuan MMS te a la tih theih ve lem loh a, heti chung hian SMS hmang chungin sexting hi an kalpui nasa hle a. MMS leh SMS te hi inang lo viau mahse an tum chu a inang reng tho a, sawi hran theih chu a ni lo. Mithiamte sawi dan chuan sexting hian mipat hmeichhiatna ang bawkin mi pahnih inkarah boruak thianghlim lo tak a siam thin a. Hetiang thil hi chin laklawh tawh chuan atchilh theih em em a ni a, hei vang hian thil hlauhawm tak a ni.
Tam takah chuan taksa intawng kher lo pawhin an kalpui a, hmai chhana inhmu kher lo pawhin thu zahmawh tak takte an inthawn tawn thin a. Hetiang thil hian kawppuite nena inthenna a thlen nasa hle a. Mi tam tak chu an kawppuite nen an hlim loh em avangin sexting lamah hian an inhmang nasa a. An rilru hah tihdamna atana hmang niin chhuanlam an siam a. A dikna chen a awm laiin, a rei deuh hnu chuan an atchilh chho a, a bawihah an lut ta thin a. An duh hunah an talchhuak leh thei thin lo a ni.
Tunhnai lawkah milar zinga hetiang thil vanga inthen phah hi sawi tur an awm nual a. Chelsea left-back Ashley Cole pawh a nupui Cheryl Cole chuan a manchhuah phah a, tunah hian an inthen mek a. A hma deuhin golf lalpa tih hial Tiger Woods pawh a lo hmingchhe hluai tawh bawk a. TV presenter lar tak Vernon Kay pawh a nupuiin sexting vang hian a manchhuak a, an inthen phah tawh bawk. Ashley Cole, Tiger Woods leh Vernon Kay te hian an hmeichhe thil thawn thinte hi an mutpui theuh a. Tiger Woods phei chuan pakhat aia tam daih a mutpui lehnghal. A tir takah chuan an tum bik kher lo ang, mahse a rei deuh hnu chuan an thiltih chu nuam tihna an nei a, tih zel chakna an nei chho a. A tawpah chuan an nupuite tana an rinawmna kha an theihnghilh phah ta a ni.
2005 vel atang khan sexting hi sawi tur a awm tan a, US, UK, Australia, New Zealand leh Canada ah te hetiang hunlai atang hian an ching tan a.
2008 a tleirawl 1,280 vel an zawhnaah chuan kum 13-19 inkar (Group A) zinga 20% leh kum 20-26 inkar (Group B) zinga 33% te chuan anmahni thlalak, saruak deuhte ch midang an thawn tih an sawi a. Group A zinga 39% te leh Group B zinga 59% te chuan midang hnenah zahmawh rawngkai thu an thawn thin thu an sawi a.
UK bikah kum 11 leh kum 18 inkar zinga 38% te chuan hetiang zahmawh rawngkai milem leh thu hi an thawn nasa tih an sawi. Ram dangah chuan tleirawl te te, zahmawh rawngkai inthawn thinte hi an manchhuak nasa tawh a, dan hmangin an hrem zel a ni. American tleirawl zinga 15% te chuan an cell phone ah milem leh thu zahmawh tak tak an dawng thin a.
12 leh kum 17 inkarah 4% te chuan anmahni saruak thlalak emaw, an video emaw chu midang hnenah an thawn tawh bawk a. Kum 17 bawr vel zinga 8% te chuan hetiang thil hi an thawnchhuak a, 30% te chuan an dawng bawk.
Hmun thenkhatah chuan sexting vanga mahni intihlum an awm nual tawh a. Kum 18 a upa Jessica Logan chuan an sikulah bilapa a nei a, a bialpa hnenah hian a saruak thlalak a thawn a. A hnuah a bialpa nen hian an inban leh ta si a, a mipa chuan thlalak hi hmeichhe dang hnenah a thawn darh ta a. Heng hmeichhiate hian Jessica chu mihur chhuahin an chhuah phah a. Jessica chuan hrehawm a ti leh ta hle a, sikul pawh a kal ngam tawh lo a. Thla hnih hnuah chuan a bedroom ah a inawhhlum phah a ni.
Thil atthlak a ni :
Sexting hi thil atthlak tak mai a ni a, milem emaw, thu emaw pawh ni se, thawn tawh chu lak let leh theih a ni tawh lo a. Mi kuta a awm tawh chuan an duh duhin an tikual thei tawh a, pawi thui tak a thlen thei tlat a ni.
Thlalak emaw, video emaw te chu midangin an neih tawh chuan cell phone mai bakah internet thlengin an thehdarh tawh thin a. Heti a nih chuan kumkhuain tihbo theih tawh lohin a awm thei a, mi nunkawng a tichhe vek thei tihna a ni a.
La naupang tak tak thlalak emaw, video emaw a nih phei chuan an khawsak zelna turah harsatna tam tak a thlen thei a. Kawppui zawn kawngah phei chuan buaina lian tak an tawk ngei ang a, kawppui tur hmuh zawh loh pawh awl tak a ni ang.
Tunlai khawvel changkang tawhah chuan mitinin privacy vawn thiam hi a pawimawh tawh lehzual a. Sexting lama inhnamhnawih loh hi a him ber a, luhchilh laklawh chuan chhuah a harsa a, a atthlak mai bakah hian thihna hial a thlen thei tih hriat a tha hle.

Sexting chu eng tihna nge?

Sexting tih chu mobile phone hmanga zahmawh rawngkai message emaw, milem zahmawh deuh deuh emaw inthawn tihna a ni.

Hmeichhe duhthusam mipa famkim chu

Hmeichhe hovin an mipa duhzawng tak an sawi a, heta ngaihdan lakkhawmah hian an mipa duhthusam chu kumkhatah cheng nuai 3 vel tal lalut an nih a ngaih bakah, 5ft 11 inches a sang an nih a ngai bawk a. Hei mai hi a la ni lo cheu, hetianga mipa duhthusam hian car changkang tak mai a neih tel a ngai bawk.
UKDating.com chuan hmeichhe 83,000 rual zette ngaihdan a lakhawm a, he ngaihdan lakkhawm atanga an chhanna tam berte chu mi pakhatah an chantir chhin a. A chunga tarlan tak khi British hmeichheho chuan an mipa duhthusam chu a ni.
Heng hmeichheho chhanna en hian an mipa duh chu lehkha pawh zir sang ve pangngai tak, a lo berah graduate chin tal an nih a ngai a. Incheina lamah pawh ti mai mai lo, smart taka inchei thin an duh tel bawk.
He ngaihdan lakkhawmah hian hmeichheho duhthusam ni tur chuan hmelthat em em pawh a pawimawh chuang lo a. Hetiang mipa hi kg 76 bawr vel a nih a ngai bawk a.
Mahni invawng fel thei tak, meizial zuk leh drugs vel tih aia gym kal ngaina mi nih a ngai bawk a. Heng hmeichhe zinga 98% ngawt chuan finna lamah pawh mi pangngai aia sang ngat an duh a ni.
Heng mipa hian wine lampang bakah ran vulh chungchang pawh an hriat a ngai a. Hmuihmul zuah, sam sei leh pa tawi deuhte chu an duh thak lo.
Hemi zirchiannaa hma latu ber, David Brown chuan, “Tunlai khawvelah hian a hma zawng aiin sum hi a pawimawh lehzual tawh a. Hmeichhe maltlat zawng zawngte hian an duhthusam anga awm theih an tum vek tawh a tih theih,” a ti a.
“Hetianga hmeichhe tlahlang te hian an duhthusam anga awm tur chuan mipa hlawh sang tak, khawsak lamah pawh nuamsa ve tak an duh phah a ni,” a ti bawk.

Sex ah thlarau mi an sang duh

Tunhnaia mithiamin an zirnaah chuan thlarau mi tak mai te hian mipat hmeichhiatna an hmang nasa bik niin an sawi a. Hetianga thlarau mi zingah pawh hian hmeichhe lam an ni duh bik tih an sawi bawk.
University of Kentucky mithiamte’n an zirnaah hian thalai zingah ruihtheih thil vang emaw, ngaihtuah lawk lem lo chung emaw, sakhaw thil emaw avanga mipat hmeichhiatna hmang ai mahin thlarau mi nih avanga hetiang lama inhmang hi an sang duh zawk an ti.
Hemi zirchianna kawnga hma latu ber, Jessica Burris chuan, “Sakhaw lama inhman leh thlarau mi nih hi kan nitin nunah a pawimawh tih hi chu mitinin rei tak chu kan lo hre tawh,” a ti a.
“Chiang lehzuala han zir takah chuan thlarau chenchilh hian danglamna tam tak chu a lo nei chiang hle a. Hei hi kawng khat chauh a ni mai lo a, kawng hrang hrangah a ni lehnghal,” a ti bawk.
An zirchiannaah hian tehna chikhat, ‘Spiritual Transcendence Scale’ an tih chu an hmang a, an chhutnaah chuan inpawhtawnna (connectedness), mi zawng zawng huap zo (universality) leh tawngtai hlawhtlinna (prayer fulfillment) te chu a bulpui pawimawh tak an ni a.
Heng thil pathum zingah hian inpawhtawnna ber hian mipat hmeichhiatna lam kawng chu a kawk tih thu sawiin, thlarau lama itna insiam chuan mi hrang hrang nena mipat hmeichhiatna hman kawngah a hruailut a. Heng mite hian a tlangpuiin mipat hmeichhiatna an hman hian condom an hmang ngai lem lo niin an sawi bawk.
He thil an zirna lamah hian university zirlai, undergraduate 353 te chu zawhna zawtin an kawm chiang a, heng zinga 61% te chu hmeichhia an ni nghe nghe a. An zawhnaah chuan ruihtheih thil tih thin dan te, rilru thawh thut ang anga chet thin dan te, sakhaw ngaihsak dan te, thlarau lam ngaihtuah dan te leh mipat hmeichhiatna an hman dante a tel a.
Thlarau nun lama an chhanna tam zawkah chuan an tawngtai emaw, fianrial hun an hman emaw hian inpumkhatna rilru an pu tlangpui niin an tarlang a. Mimal taka inpawh chu thil harsa niin lang mahse, a nawlpui nena inhawng taka inpawh duhna an nei ta thin niin an tarlang bawk.
Hetianga rilru lama inpawhna tha tak nei vek tura ngaihtuahna an put vang hian mipat hmeichhiatna lam pawh zalen takin an hmang ta mai thin a. Hei hi sualah pawh an ngai lem lo a, thil pangngai ve tak ni maiin an ngai tawh a ni.

Guitar zut nalh ber Jimi Hendrix

Kum 40 chuang a ral tawh a, guitarist ropui tak tak an chhuak hnem tawh hle a, heti chung hian ‘Guitar Lalpa’ ti hiala hriat Jimi Hendrix chu guitar zut nalh berah an la thlang ta cheu a. Amah ber hian fam chang tawh mahse tunhnai khan musician rualte chuan 1970 vela Jimi Hendrix hla ‘Voodoo Child (Slight Return) a guitar zut chu tun thlenga guitar zut mawi berah an thlang. Voodoo Child hian Guns N’ Roses hla ‘Sweet Child O’ Mine’ chu a khum a, Slash-a guitar zut hi pahnihnaah a awm a. Kum 5 kalta khan Total Guitar magazine chuan hetiang hi an thlang a, hemi tum hian ‘Sweet Child O’ Mine’ hi pakhatna a ni thung. Tun tumah hian musician website MusicRadar.com chuan guitar zut nalh ber thlanna hi an buatsaih a. Khawvel hmun hrang hranga musician rualte chuan vote hi an thlak a, Jimi Hendrix hi a chungnung ber a ni. Top 20 an thlanchhuah zingah hian Michael Jackson-a hla ‘Beat It’ pawh 20 naah a lang a, he hlaah hian Van Halen guitarist Eddie Van Halen chuan a zut a ni. Pakhatna dinhmun hauhtu Voodoo Child bul tan nan hian Hendrix chuan ‘wah-wah’ effect a hmang a, a hmaa Jimi Hendrix-a hla ‘Voodoo Chile’ tih chhunzawmna niin, a album ‘Electric Ladyland’ ah a telh a. 1970 khan single angin a tichhuak a, a hnu chuan a hming pawh hi Voodoo Chile tiin a thlak ve leh a ni. Guitar zut nalh thlanchhuah zingah hian hranghlui lam an lang hnem hle a, tunhnua mi chu pahnih chauh an lang a tih theih a. The White Stripes guitarist Jack White leh Muse guitarist Matt Bellamy te bak chu tunhma lam chhuak vek an ni. MusicRadar.com tlawhtu mi 5,000 chuangin vote an thlak atanga a lan dan chuan 2009 ah pawh tunhmaa rock music khan rimawi ngainatute a la hneh ber a tih theih.
Top 20 :
1. The Jimi Hendrix Experience - Voodoo Child (Slight Return)
2. Guns N' Roses - Sweet Child O' Mine
3. Led Zeppelin - Whole Lotta Love
4. Deep Purple - Smoke On The Water
5. Derek and the Dominos - Layla
6. AC/DC - Back In Black
7. Metallica - Enter Sandman
8. The Beatles - Day Tripper
9. Nirvana - Smells Like Teen Spirit
10. The Rolling Stones - (I Can't Get No) Satisfaction
11. Black Sabbath - Paranoid
12. Muse - Plug In Baby
13. Eddie Van Halen - Ain't Talkin' 'Bout Love
14. The Kinks - You Really Got Me
15. The White Stripes - Seven Nation Army
16. AC/DC - Highway to Hell
17. Led Zeppelin - Heartbreaker
18. Black Sabbath - Iron Man
19. Led Zeppelin - Black Dog
20. Michael Jackson - Beat It

Football hlapui - "You'll never walk alone"

English Premier League en thangte zingah chuan hre lo an awm lo ang tih theih, Liverpool FC hlapui ‘You’ll Never Walk Alone’ hian chanchin a ngah phian mai a. He hla hi football kaihhnawih thilah chuan khawvel hmun hrang hranga sak hlawh ber a ni a, thenkhat phei chuan ‘Football khawvela tawngtaina hla’ ti hialin an sawi a. A chanchin hi chiang zawkin belchiang ila.
He hla ‘You’ll never walk alone’ tih hi musical pakhat, ‘Carousel’ tiha telh tura Richard Rodgers leh Oscar Hammerstein II te phuah a ni a. ‘Carousel’ hi Ferenc Molnar-a’n lemchan pakhat a phuah ‘Liliom’ tih atanga lakchhawn a ni.
‘You’ll never walk alone’ awmna lemchan ‘Carousel’ hi April 19, 1945 khan Broadway ah an hawng a, vawi 890 ngawt an entir nghe nghe a. He lemchanah hian a changtunu Julie Jordan-i cousin Nettie Fowler chuan ‘You’ll never walk alone’ tih hla hi Julie te nupa thlamuan nan leh Julie pasal Billy Bigelow-a’n ruk ruk a tumna a tlawlh avanga intihhlum a tum laia Julie fuih nan a hmang a ni.
He lemchan tawp dawna an fanu Louise-i’n a lehkha zir lai tha taka a zawh avanga fuihna atan leh an nufaa a hmangaihzia lantir nan a pa Billy chuan a rawn sa ve leh bawk.
Liverpool khaw band, rock and roll group ‘Gerry & the Pacemakers’ khaipa ber Gerry Mardsen chuan he hla hi nalh a ti em em mai a, a band member te hnenah chuan sak ngei a duh thu a sawi a. An han sak chhoh takah chuan hriat an hlawh phah ta hle a.
Hetianga Liverpool khawpuia a lar chhoh takah chuan Liverpool Football Club pawhin a thluk chu an hmang phawt a, a hnulamah a hla thu pawh chu an chhawm zui ta zel a. A tawpah phei chuan a hla thupui hi an club chhinchhiahnaah hial an telh zui a, tun thlengin an la hman chhunzawm phah a ni.
1963 khan khatih laia Liverpool manager Bill Shankly chu Gerry Marsden chuan ‘You’ll never walk alone’ tih hla an thun fel vek tawh chu a pe a. Shankly chuan a duh em em a, football chanchin ziaktute chuan an hre ve leh a, Liverpool FC chuan Gerry Marsden-a hla hi an club hlapuiah an hmang dawn tih chu mi hriatah an puang ta a ni.
Tunah chuan Liverpool mai pawh ni lo, khawvel hmun hrang hranga club te chuan he hla hi an chham rual dual dual tawh mai a. Football ngaina tak tak inti te zingah chuan hre lo an awm lo ang tih theih a, football khawvelah chuan he hla aia sak hlawh hi a awm chuang lo.
He hla lo sa tawh hi an thahnem hle mai a, heng zinga a langsar zual thenkhatte chu :
1. Gerry & the Pacemakers :
Gerry & the Pacemakers in an sak hi hriat hlawh leh lar ber chu a ni a, khawvel hmun hrang hranga football stadium chhunga ri thin chu anni sak hi a ni.
2. Die Toten Hosen :
German rock band Die Toten Hosen hian an ram chhunga football fans te tan he hla hi an sa a, football hmunpuiah chuan anni sak hi a ri reng mai a ni.
3. The Three Tenors :
The Three Tenors an tih thin, classical lama miropui - Plácido Domingo, José Carreras leh Luciano Pavarotti te chuan a dan dang deuhin he hla hi an vawrh ve leh a ni.
4. Tom Jones :
‘The Tiger’ an tih, Tom Jones chuan soul music lam hawiin a sa a, hriat pawh a hlawh lehzual phian.
5. Jordin Sparks :
‘American Idol’ hian a dinhmun ropui tak thlenna kawngah he hla hi fuh em emin a vawrhchhuak a, a dinhmun siamtu pakhat niin an sawi.
6. Renée Fleming :
Renée Fleming chuan US president Barack Obama lawmna ‘The Obama Inaugural Celebration Concert’ ah he hla hi a sa a, lawm a hlawh hle.
7. Elvis Presley :
‘The King’ chuan ama style pangngaiin he hla hi a sa a, he hla sa tawh zawng zawng zingah chuan a thlawh fuh ber pawla sawi a ni.
8. Celtic FC supporters :
Celtic FC fans te chuan 2004 UEFA Cup a FC Barcelona nen an inkhelh dawn tuma firfiak hovin fans kalkhawm an thahte hriatreng nan an sa a, mi thinlung a hneh dan a danglam hle.
9. Danielle & Jeri :
English hmeichhe pahnih Danielle leh Jeri te hian rui deuh chungin Karaoke khawl hmaah he hla hi an sa a, hei hi YouTube ah an dah a, lawm a hlawh phian.
10. Liverpool FC fans :
Sawi tam a ngai lo, Anfield Road, Liverpool ah chuan hei baka hla ropui hi a awm thei tawh lo.

2012 ah khawvel a tawp dawn lo

Mayan Calendar en thiamte’n December ni 21, 2012 ah khawvel a tawp dawn an ti niin sawi a tam hle a. Khawvel hmun hrang hrangah he thu hi buaipuitu an tamin, chi-ai phah tawkte pawh an Thahnem hle a. Mizoramah ngei pawh he chanchin hian ngaihven a hlawh a, buaipuitu an tam chho hle bawk a. Tunhnai khan Mayan pa upa lam pakhat, Apolinario Chile Pixtun chuan hei hi a dik loh thu a sawi bakah, heti taka sawi a hlawh mai hi ninawm a tih thu a sawi ve tlat.
Chile Pixtun chuan khawvel tawp hun tur chungchang hi chu Mayan ngaihdan ni lovin, khawthlang lam mite Tan chhuah a nih thu a sawi a. 2012 ah chuan khawvelah thil danglam chu a thleng dawn nia an ngaih thu sawiin vansang lamah pawh thil chhinchhiahtlak tak a awm dawn tih chu Mayan ho chuan an rin thu a sawi bawk a. Hetiang a nih avang hian khawvel a tawp dawn nia ngaihna erawh an neih ngai loh thu a sawi.
A sawi zelnaah chuan hetiang ngaihdan hi 1960 bawr vel daih aTanga inTan tawh a nih thu te, a bul ber chu ‘Monument Six’ a nih thu te a sawi a. ‘Monument Six’ hi lung phek, thil inziah Teuhna, a inziak erawh hrilhfiah thiam har tak a ni a. An hriatthiam theih lai Thenkhatah chuan 2012 ah hian Mayan pathian pakhat, indona leh bul Tantu pathian Bolon Yokte kaihhnawih thil, eng emaw lian tham tak a thleng dawn niin a inziak niin Chile Pixtun chuan a sawi.
Mayan ho hi 300 A.D. aTanga 900 A.D. inkar vel khan an vanglai tak a ni a. An thiamna a sang a, vansang lam an hre bel em em mai a. Tunlaia titi titamtu ber Mayan Calendar pawh hi kan calendar hman Thin (Greco-Roman Calendar) ai chuan a rintlak zawk hle niin mithiamte chuan an sawi.
Mayan Calendar hi 3,114 B.C aTang khan a inTan a, hun inThen dan pawh a danglam hle a. Kum 394 dan zelah a inThen hlawm a, hetiang hun khat zel hi ‘Baktun’ an ti a. 13 hi Mayan ho nambar serh a ni a, Baktun 13-na chu December ni 21, 2012 hian a tawp dawn a, hei hi Thenkhatin an lo sawi kawi deuh a, khawvel tawp hun tur angin an sawi niin a lang.
Hrilhlawktu ropui bera chhal Nostradamus pawh khan khawvel tawp hun tur tak chu sawi lo mahse 2012 hnulamah hian thil a la hrilhlawk hnem hle a. Hei hian Mayan Calendar behchhana khawvel tawp tur anga sawi hi a rawn kalh ve leh bawk a. Nostradamus khan a hrilhlawkna hi 3797 thleng daih a nih thu a ziak a, heti a nih chuan khawvel chu a la tawp mai dawn lo niin a ngaih theih.
Hetiang hrilhlawkna zawng zawng hi ngaih thutak chi a ni lo hle a, amah Nostradamus-a ngei pawh hian thil dik lo tak tak a sawi ve fo reng a. A hrilhlawkna pakhat chuan 1999 ah khawvel a tawp dawn ni angin a kawk a, tun thlengin a la tawp lo chu ania.
He hrilhlawknaah hian “Kum 1999, thla sarihnaah (July, 1999) ah van aTangin Lal ropui leh hlauhawm tak a rawn kal ang” tiin a sawi a, hetianga sawi tur hi a awm ta lo.
Nostradamus Code zirchiangtute chuan he hrilhlawktu ropuiin a lo ziah dan chuan 2009 leh 2012 inkar chhung hian khawvel hmun hrang hrangah buaina lian tak, indona, beidawnna leh sualna a nasa hle dawn a. Hetih rual hian hemi hun chhung hi beiseina leh thutiam Tha tak inTanna tur angin a ziak tel bawk.
2012 chungchangah hian hrilhlawkna chi hrang hrang a awm nual a, hengte hi rintlak em em an nih hmel loh hlawm hle a. |henkhat chuan Sony Pictures in ‘2012’ tih film an siam tur tihlarna atan hetiang thu hi a darh ta hluai niin an sawi a. He film hi hralh a kal theih zawk nan mi rilru an kai peng mai niin an ngai.
Kum 2000 pawh kha khawvel tawp hun tur angin an sawi nasa hman hle a, History Channel ah te hial an tilang nasa hle a, mahse eng teh ual chu a thleng ta chuang lo a. Mi Thenkhatin sum tam tak an siam theih nan midangte rilru-ah hlauhna an tuh kual vel mai mai niin a lang a. Hetiang thawm hi an vaw vul chuk a, lehkhabu leh TV hmangin sum siamna atan an lo hmang hmiah zel mai a. 2012 chungchang pawh hi hetiang deuh bawk hi niin a ngaih theih.

Setana biakna, kan ram leh kohhran

Kum 1966 khan mi pakhat, Anton S. LaVey chuan United States ah Setana biakna hi a ching chhuak tan a. A tir takah chuan pawl pakhat 'Magic Circle' tih chu San Francisco, California ah a tan a, he pawla telte chuan mihring sa an ei thin a. Maksak taka an chet thin avangin an pawl chu a lar chak hle a, 'Setana Kohhran' chu a ding tan a ni ta mai a, mi 10,000 vel lai an tel nghal a. Hetih lai vel hi chuan U.S. Constitution chuan 'Church of Satan' hi sakhaw chikhatah a pawm mai a. He pawl vanga sualna pung nasa lutuk vangin USA a State 24 zeta thuneitute chuan Bill of Rights an duan phah hial a. Setana betute hian saruakna, hurherhna, mahni anpui nena inpawlte bakah mihring leh ran nghaisak lam an ti nasa hle. Thalai lamin an intihhmuh chho a, an thalai pui, thian nei vak lo te, mahni inkiltawih chi te chu an thur chhuak a, Setana biakna lamah hian an hruailut ta thin a. Setana be thinte chu an zirlaiah an tlahniam nasa a, chhan awm lem lova thinrim vak te an ching a, an sam an dum nasa a, an mit veilam chungah an sam an titla chham thin a (Emo style angin), rilru hnual chang an ngah a, thil an ziak nasa a, thihna hi an ngaihven hle a ni. 1960 hmalam kha chuan Setana betu chu awm ve bawk mahse a langin an che ngam lo a. British Witchcraft Act 1735 chuan Britain chhunga dawi lam tih a khap bur mai a, he dan hi 1951 khan an hlip a, Anton S. LaVey chuan langsar zawkin bul a rawn tan tha ta chiah a ni.
Setana betu chihnih :
Setana betu hi chihnih a awm a, Theistic Satanism leh Atheistic Satanism te an ni a. Theistic Satanist te chuan Setana chu thil engkim ti thei, fel leh tha em em niin an ngai a. Atheistic Satanist te hi Setana awm ring lotu an ni a, Setana chu thil awm tak tak lo, mihring mize chikhat entirna ang chauhin an ngai thung a. Heng bakah hian sawi ve tur ting chuan Temple of Set leh Symbolic Satanism te pawh a awm bawk.
Theistic Satanism :
Theistic Satanism (Spiritual/Traditional Satanism an tih bawk) ah hi chuan Setana hi pathian ropui ber, engkim ti thei, thil engkim siamtu niin an ring a. Dawi lampang te, rilru kal dingtir te, mahni intihlen zel te chu an kal dan a ni.
LaVeyan Satanism :
Anton Szandor LaVey kohhran dinah hian mahni intuituah, mahni hmasial te, phuba lak te an inzirtir ber a. Anni hi Atheistic Satanist huanga awm niin, Setana chu awm tak tak lo, mihring mize awmsa entirna ang chauhah an ngai a ni. Anni hian an thiante chu an duat viau laiin midangte chu tihnat an hreh lo hle a, an duhna tihpuitlin zel an tum thin a, heng an thil duhte hi a tha lam sawi tur a awm lo hle. Setana biakna lama an tum ber chu Pathian duh dan ang zawng zawng kalha chet a ni ber a. Setana chuan a chhia leh bawlhhlawh apiang a lawm bawk a, amah zuitute pawhin hetiang zawnga inhman hi an tum ber bawk a. Midangin an tuar dawn a nih pawhin anmahniin nuam an tih miau chuan midangte ngaihdante chu an dah bo hmiah mai a ni. Khawtlangin thaa an ngaih hi an tan chuan thil tha lo a ni thung a, midangte chunga that chhuah chu thil tha lo berte zingah an ngai thin. Mi pawi khawih chu an tum ber a nih avangin naupang leh puitling nghaisak lamah an tuan tan a, hetiang tih chingte hi thuneitu lam chuan an man khawm a, an tihlum zel mai a ni. Setana betute hian mihring leh ran nghaisak te, pawngsual te, mihring leh ran hmanga inthawina te leh nung chunga inphumte hi an uar hle a. Tlema naupang deuhte chuan an chunga thleng ang chu naupang dang emaw, ran chungah emaw an ti ve leh chhawng thin a. Mipat hmeichhiatna an hman bakah mahni taksaa ser (Tattoo) siamte an uar hle a. Hetianga tattoo ziah hi Bible chuan a phal loh thu a tarlang chiang hle a, Leviticus 19:28 ah 'in intial tur a ni hek lo' tih a awm. Rom 16:17-18 ah chuan hetianga rinna kaipeng thei zawnga inzirtirna laka fimkhur tura chahna leh, Setana duh dana awmte chungchang chiang takin a inziak a. Chang 18 ah chuan 'Chutiang mite chuan kan Lalpa Krista rawng an bawl lo a, anmahni pum rawng an bawl zawk thin a; an kam that leh an kam thiamin mi fing lote rilru an bum thin' tiin a inziak a ni. Thupuan 3:21 ah Pathian tana rinawmte dinhmun tur chiang takin a inziak a, 'A hnehtu apiang ka lalthutphahah ka hnenah ka thuttir ang. Kei pawhin ka hneh a, ka Pa hnena a lalthutphaha ka thu ang khan' tiin a inziak.
Kan ram lamah :
Kan ram hi sap nun dan la nasa tak mai kan ni a, an khawsak dan kan lak zingah hian a tha lam aiin a tha lo lam hi a tam zawk a. Setana biakna lam pawh hi engtik atang emaw khan kan senglut ve ta reng a. Thil hre ziktluak tak tak si lovin, chhumbung deuhin kan hria a, a that lohna leh a hlauhawmna lai ngaihtuah lovin kan ti ve leh mai zel a ni. Kan ramah Setana biakna lama inhmang hi sawi tur an awm ve ta teuh mai a, heng mite hi belhchian chuan an hlim ngai lo a, nun nuamin an awm ngai hek lo. Anmahnia thawhtirtu tih ang angin an awm a, mahni thu pawhin an nung thei tawh lo a. Eng emaw chen chu an duhzawng, ruihtheih thil nei thei thin mahse rei a daih lo a, a hnuah chuan hrehawm takin an tawp mai thin. Hmanni lawk pawh khan Aizawl tlangval pakhat, tunhma deuha Setana be thin chu a inawkhlum a. Ani lo pawh hi tawpna rapthlak tak tak sawi tur chu an awm bawk a. Hei hian Setana biak hian hlimna tluantling leh vanneihna a thlen lohzia a tilang chiang hle. Tunlaia heti tak maia kan thalaite zingah Setana biakna a hluar ta mai hi eng nge a chhan ni ang le ? Kohhran tinte pawh hi kan beram rualte theuh kan enkawl danah kan inngaihtuah let te pawh a tul viau tawh lo maw ? Thlarau sual hian rawngbawltu der leh tak hi an hai lo a, i nun kha Lalpa rawngbawltu i nih chuan uluk hle rawh. Tin, Setana biaknaa inhnamhnawih tawhte hian nun simin nun thar Krista ah nei thin mahse, an nunhlui hian a umzui zel avang leh an taksaa tawrhna nasa tak an neih fo avangin an nun ngaiah an kir leh fo thin a. Hei vang hian tih ve chhin loh hi a tha ber a. A ti tawhte leh a bawiha tangte pawh hi an duh hun hunah an chhuak thei lo mai ni lovin, an thil tih hian thatna lam kawng an zawh hnu pawhin a umzui tlat zel avangin hetiang lama inhmangte hi chu thlahthlam lova venpui zel an ngai hle.
Biak in suasam hi :
Tunhnai maiah biak in pakhat suasam a ni a, a hma deuh pawhin sawi tur a awm tawh bawk a. Mak em em mai chu engatinge kan biak in thianghlim meuh pawh zahpah miah lova sual hian a luhkhung ngam tak mai le ? A hmaa kan sawi tawh ang khan Setana betute hian anmahnia a ‘tirtu’ an hlauh avangin loh theih lohin an suasam ta pawh ni se, sual hnathawh dang vang hrim hrim pawhin suasam theih tho chu a ni ngei mai. Mahse, heti zawng hian in ngaihtuah dawn teh ang.
Kohhrante hi kan harh a ngai a ni :
He thu hi chu sakhaw la run leh kohhran hi Pathian ang maia ngaitute tan chuan a nain an helh ngei ang. Mahse, sawi a tul tlat si a ni. Dik tak chuan eng kohhran mai pawh (Kohhran te lutuk tiam lovin) hian biak in kan sak hian a satu tur atan hnamdang (vai) kan ruai tlangpui a. Mizo thalaite cement mistiri leh hnathawk peih kan awm loh vang leh hna kan thiam loh zawk vang ni maw ? Tichuan, Kristian pawh ni hlei lo ten kan Pathian biakna tur chu an han sa ta a. A len tham avang leh sak chhungte a rei thin avangin hmun thenkhatah phei chuan mistiri te chen nan pindan (room) lian vak lo an siam a. Tichuan, kan biak in sa chung reng khan an pindanah khan an pathian hnenah te inthawiin an pathian an lo be ve reng thei a ni. Chu mai ni lovin, kan hriatpui loh tur leh kan hmuhpui loh hian an pathian sign/symbol te pawh kan biak inah hian an lo phum ru reng thei bawk a. Tin, an sak pahin hla (Pathian fakna ni lo) sain, Kristiante duh lohna thu te hi an sawi lo ang tih tunge sawi thei ? Kan Pathian biak in hi an pathian tante pawh an lo hlan reng thei bawk a. Kohhran tinte kan harh a hunin kan fimkhur a pawimawh tak zet a ni. Biak in thenkhatah chuan a biak in bel ni lo, a building tho si ah te dawr a awm thliah thluah a. Heng dawrah te pawh hian thil chi hrang hrang - computer, mobile phone te leh thil dang tam tak a awm a. Entir nan, khawi dawr berah emaw khan blue film te lo awm ta se, (e.g. computer, mobile phone, internet, CD ah te) sual tan chuan a zuamawm mai ni lovin, a hlauh loh tur zia mai chu!!! Tin, dawr nghaktu pawh nula/tlangvalte lo ni ta se, an bialnu/bialpa te nen chance neih nan pawh an lo hmang palh thei bawk a, fimkhur a tulin ngaihtuah that a va hun ta em!!! Thliar sin peih min ti viau maithei a; mahse, sual luhna leh sual kalkawng leh sual inrawlhna hi chu thil te tham tak nia kan ngaih ah pawh hian a ni thei zel a. Chu vang tak chuan kan fimkhur chu a tul tak meuh a ni. Bible pawhin ‘Hmun thianghlim min siamsak rawh se, an zinga ka chen ve theih nan’ a tih kha. Chuti a nih si chuan heti tak maia kan Pathian biak in pawh sualin a hlau lo leh a luhkhung ngam ta mai hi ‘a titute’ hi dem mai lovin kohhrante pawh hi i inenlet ngam ang u. ‘Biak in lai chauh’ vawng thianghlima, a building dang kan vawng thianghlim leh si lo a nih chuan Lal Isua pawh khan biak in kha a thianfaiin thil tam tak a thehchhuak a ni lo’m ni ? Kohhran sum hnar nia kan ngaih mek lai hian a lehlamah chuan sual tan chetna tur hmun kan siam tel zel tho thei a ni tih hriain i fimkhur thar ang u. Kristian 100% tia inchhal ngam State ah hian Setana betu intite hi an la tlem em mai. Ruihhlo bawiha tangte pawh a tlem zawk an ni lo’m ni ? Chuvangin, Lalpa tan hian i tang thar leh teh ang u. Kan Pathian hi Pathian thikthu chhia, ti kher kher a ni si a. Tawngkaa ‘tak’ hi a tawk lo a, ‘thu sawi huai’ ai chuan ‘huai taka Pathian thu nunpui ngam’ kan mamawh tawh zawk a ni lo maw ? Eng nge i thlir ve dan le ?

Rock Music History

Rock music hi rimawi chikhat, lar chak tak mai, 1960 vel bawr atanga thawm rawn nei lian tan a ni a. A bul tak chu 1940 leh 1950 vel khan rock and roll, rhythm and blues, country music, folk music, jazz leh classical music kaihkawp atangin a intan tawh a ni. Rock music hi guitar ri leh bass guitar, drums leh keyboard inpawlh khawm mawi tak hmanga siam a ni a. 1960 leh 1970 tirlam khan rock music ri mawi danglam tak a rawn chhuak tan a, hemi atang hian rock hnuaiah chi hrang hrang a rawn piang chak hle a. 1970 hnulam khan soft rock, glam rock, heavy metal, hard rock, progressive rock leh punk rock te chu a piang a. 1980 hnulamah new wave, hardcore punk leh alternative rock te a rawn piang ve leh a. 1990 hnulam khan grunge, Britpop, indie rock leh nu metal te a pian belh ve leh bawk a. Rock band emaw, rock group ah emaw chuan a lo berah mi pali an ni thin a. Lead guitarist, bass guitarist, lead singer leh drummer te chu rock band tikimtu an ni a. Group thenkhatah chuan an lead singer hian lead guitar emaw, bass guitar emaw an perh tel thin a, hengah hi chuan mi pathum chauhte pawh an ni thin.
A bul atangin (1940s-1960s) :
1940s vel khan khatih laia rimawi lar country leh blues te chu electric guitar leh drums nen an pawlh chho a, rock music bulpui chu a rawn intan a. 1950s velah Chuck Berry a rawn lar chho a, ‘60s rawn inher chhoh chuan Chuck Berry ngaisangtute zinga mi Rolling Stones chuan rimawi chi thar hmangin khawvel an rawn tuam tan a. A hmaa mimal hming lar viau thin kha Rolling Stones hian rawn thlakin band chu mi thinlungah a tlak nat phah hle a ni.
Rock Music darh chho (1970s) :
Rock music chuan rimawi ngainatute thinlung a luah hneh tawh hle a, hetiang taka mi a hneh avang hian band pawh an pung chak hle mai a. 1970s chho khan Led Zeppelin an rawn inlar a, a hmaa rock music kalphung kha rawn thlak danglamin hard rock leh heavy metal hmangin ram an rawn la tan a. Hetih lai vel tho hian Pink Floyd chuan rock music chidang leh, psychedelic rock chu khawvel hmaah an rawn phochhuak ve bawk a. 1970s chho ah hian ‘hippie band’ an tih mai Pink Floyd tih vel rawn khing turin Sex Pistols leh Clash te chu rawn dingin rimawi ring deuh mai, midangte na taka nawr thei hla thu nen punk rock bul an rawn tan ve leh a. Hard rock, psychedelic rock leh punk rock te hian kalphung bik an nei theuh a, an hlawhtling hlawm viau mai a. Anni bakah hian Pere Ubu leh midangte chuan tlema danglam leh deuh, industrial rock an rawn tan thar ve leh bawk a. Industrial rock hi chu a dang angin lar hluai lo mahse an kal chho ve reng a. Rock ngainatute chuan Deep Purple, Led Zeppelin, Black Sabbath leh Judas Priest chu an atchilh nghet tlat tawh mai a ni.
Rock Music a inthensawm (1980s) :
1980s a rawn inher chhuak a, rock kalphung pangngai chu a rawn danglam leh ta a. Punk rock kalpuitute pawnlam lan dan leh industrial rock zawmtute hmanrua kaikawpin English band Depeche Mode te chuan rock music dang, new wave an rawn chhuahpui ve tan a. American band R.E.M. chuan punk music hrul deuh si, rock band pangngai kalphung zawm tel siin rimawi chithar an rawn chhawp chhuak ve leh a. Anni hi college radio station velah an lar em avangin college rock an tih phah a ni. 1980s tawplamah chuan alternative rock in rimawi khawvelah hmun a luah nasa hle a. 1988 khan Billboard chuan alternative rock tan bik hian chart thar a siam a, an sawi chhuah lehna ah chuan modern rock tiin a hming hi an phuah zui a. 1980s ah hian kan ramah pawh kan lo hmelhriat em em, heavy metal chu a rawn lar hle mai a. British band Iron Maiden leh Def Leppard te chuan rimawi danglam tak mai hmangin rimawi ngainatute an rawn run a. Van Halen, Metallica, Megadeth te chu hahipa sawi an ni a. Glam metal (1980s) : 1980s ah hian rock danglam leh mi hip na tak glam metal an tih mai chu a rawn piang a. Rock music style dik tak leh glam look an tih mai chu rawn chawhpawlhin Queen, Sweet leh New York Dolls te kalphung an rawn zawmkhawm a, an lar chak hle. Motley Crue, Ratt, Quiet Riot, Guns N’ Roses, Warrant, Poison, L.A. Guns, Faster Pussycat, Twister Sister leh band dang tam tak te chuan 1987 vel atangin thawm an rawn nei lian hle a. Heng band te hian an music kalphung tha tak mai an larpui bakah, an hmel lan dante chu an hmaa mite ang lo deuhin an rawn siam a. Sam sei tak, thenkhat chu thur deuh bem bum an put bakah make-up an hmang nasa a, an thawmhnaw pawh mi mit la thei tur ber, leather, jeans tih vel an inbel nasa hle. Glam metal hi a style hrang hlak tihna a ni lo a, an music kalpui chu heavy metal niin, ‘glam’ tih hming a put tel chhan ber chu an pawnlam lan dan vang liau liau hi a ni.
Rock Music pianthar lehna (1990s) :
1991 khan Nirvana chuan ‘Nevermind’ album an tichhuak a, alternative rock chu a alh chho ta hluai mai a. Hemi rual hian grunge rock an tih mai, hard rock leh punk rock inpawlh chu a rawn lar chho a, hetiang lam auchhuahpuitu Soundgarden te chuan rimawi khawvel chu an al hneh hle mai a. Nirvana dintu Kurt Cobain chu a intihhlum tak avangin alternative rock pawh hian thawm a nei chau nghal vat a, rock music kalphung pangngai chuan rimawi khawvelah thawm a rawn neih len leh phah a. Limp Bizkit chuan hard rock leh rap inpawlh hmangin style thar danglam tak mai an rawn larpui a. Staind leh Puddle of Mudd te chuan Limp Bizkit kalphung an rawn zawm a; mahse, anni hi chuan melodic hard rock an hrut tel thung a. Band tam tak, grunge kalpui deuh si, alternative huanga tel thei chiah si lo - Red Hot Chili Peppers te chu an rawn lang ve tan a, anni bakah hian Foo Fighters te pawh an rawn lang ta bawk a. Kum zabi 21 na a rawn inher chhuah meuh chuan 60s vel bawra rock ang kha a rawn piang chhuak tha leh a, mahse an kalphung erawh tunlai rimawi nena kaihkawp a ni tawh thung a. Heng zingah hian Linkin Park chu a langsar pawl an ni a, anni hian hip-hop leh metal an kaikawp a. 3 Doors Down chuan hard rock lam kalpui chungin contemporary music chu an telh a, style danglam tak mai an rawn nei a ni. Rock music hi a tawp mai dawn lo a, kalphung pangngai rengin kal lo mahse style thar deuh hmangin nakin zelah pawh a la nung reng dawn tih a chiang a. Rock bulpui ban chuang si lovin, thil thar nen inkawp chungin a nung zel dawn a ni.